APA-nın Moskva müxbirinin verdiyi məlumata görə, Rusiya Elmlər Akademiyasının prezidenti, akademik Vladimir Fortov akademik Abel Məhərrəmovu yüksək ada layiq görülməsi münasibətilə təbrik edərək onun Azərbaycan və dünya elmi qarşısındakı xidmətlərindən danışıb: "Abel Məhərrəmov 54 ixtiranın, 51 dərslik və dərs vəsaitinin, 1000-dən çox məqalə və tezisin müəllifi, 60-dan çox alimin elmi rəhbəridir. Akademik Abel Məhərrəmov dünyanın bir çox nüfuzlu universitetlərinin, o cümlədən Rumıniya, Türkiyə, Albaniya, Qazaxıstan, Ukrayna, Çinin bir sıra universitetlərinin fəxri doktoru, Lomonosov adına Moskva Dövlət Universitetinin isə fəxri professorudur. Bir çox dövlətlərin yüksək mükafatlarına və müxtəlif fəxri adlarına, o cümlədən "Elm və Texnologiya sahəsində 2012-ci ilin İSESCO mükafatı”na, İqtisadi Əməkdaşlıq Təşkilatının Qızıl medalına layiq görülüb”.

 

 

Azərbaycan və Rusiyanı çoxəsrlik dostluq əlaqələri birləşdirdiyini vurğulayan A. Məhərrəmov xalqların bütün sahələrdə, həm də elm və təhsil sahəsində sıx əməkdaşlıq etdiyini söyləyib: "Sovet İttifaqı dağılandan sonra əlaqələrimiz deformasiyaya uğradı, destruktiv dəyişikliklərə məruz qaldı. Lakin dövlət başçıları İlham Əliyev və Vladimir Putinin müdrik və balanslaşdırılmış siyasəti sayəsində bu gün ölkələrimiz arasında tarixi əlaqələr yüksək səviyyədədir. Hazırda bu qarşılıqlı əlaqələr daha da dərinləşir, genişlənir və dinamik inkişaf edir”.

 

A. Məhərrəmov Bakı Dövlət Universitetinin adından Rusiya Elmlər Akademiyasının Rəyasət Heyətinə Azərbaycan və Rusiya prezidentlərinin şəkilləri həkk olunmuş lövhə və Bakı Dövlət Universiteti və Moskva Dövlət Universiteti kimyaçı alimlərinin birgə yazdıqları monoqrafiyanı təqdim edib. ABŞ-da ingilis dilində dərc edilmiş "Qeyri-kovalent qarşılıqlı təsir” adlı həmin monoqrafiya REA-nın təklifi ilə rus dilinə tərcümə edilib və dərslik kimi ali məktəb tələbələrinə tövsiyə olunub.

 

Qeyd edək ki, A. Məhərrəmov Rusiya Elmlər Akademiyasında 2016-cı ildə keçirilmiş səsvermənin nəticələrinə görə bu nüfuzlu elm ocağının həqiqi üzvü seçilib. Səsvermə üç mərhələdə həyata keçirilib. Seçkilərdə müxtəlif ölkələri təmsil edən 2400 alimin namizədliyi irəli sürülüb. Səsvermənin nəticələrinə görə, ABŞ, Böyük Britaniya, Yaponiya, Çin, Almaniya, İsrail, Norveç və digər ölkələri təmsil edən yalnız 64 görkəmli alim, o cümlədən 7 Nobel mükafatçısı REA-nın həqiqi üzvü seçilib.