Ötən ilin mart ayında Azərbaycan Respublikasının Prezidenti “Hacı Zeynalabdin Tağıyevin abidəsinin ucaldılması haqqında” müvafiq sərəncam imzaladı. Mədəniyyət Nazirliyi, Bakı Şəhər İcra Hakimiyyəti və Heydər Əliyev Fondu Hacı Zeynalabdin Tağıyevin heykəlinin hazırlanması ilə bağlı açıq heykəltəraşlıq müsabiqəsi elan etdi.

Xalq rəssamı Xanlar Əhmədovun layihəsi qalib oldu və heykəlin hazırlanma işlərinə ötən ildən başlandı. 2.5 metr hündürlükdə olan bürüncdən hazırlanan heykəl tam hazırdır və Bakı şəhərinin mərkəzində İçərişəhər metrostansiyasının qarşısında ucaldılması nəzərdə tutulur.

Lakin xeyli müddətdir iş getsə də, heykəlin qoyuluşu prosesi hələ də gecikir. Mədəniyyət Nazirliyindən musavat.com-a bildirildi ki, hazırlıq işləri tamamlanmaq üzrədir: “Ərazidə heykəlin ucaldılması məqsədilə qazıntı və fundament qoyulması üçün hazırlıq işlərinə artıq başlanılıb. Mədəniyyət Nazirliyi və Bakı şəhər İcra Hakimiyyətinin apardığı müzakirələr nəticəsində heykəlin ucaldılacağı gün müəyyənləşdiriləcək”.
Qeyd edək ki, qısa müddət öncə Bakı Şəhər İcra Hakimiyyətinin başçısı Eldar Əzizov Hacı Zeynalabdin Tağıyevin heykəlinin açılışı ilə bağlı işlərin davam etdiyini açıqlamışdı. İcra başçısı Heydər Əliyev Fondu tərəfindən ucaldılacaq heykəlin açılışı üçün heykəltəraş və mütəxəssislərin hazırlıq işləri gördüyünü, prosesin mütəxəssislərin fəaliyyətindən asılı olacağını, eyni zamanda heykəlin yaxın zamanda açılacağını bildirmişdi.