Əli Babayev: “Diasporla İş üzrə Dövlət Komitəsi formal tədbir keçirib pul silməklə məşğuldur”

Müsahibim Gürcüstanda ictimai-siyasi fəaliyyəti ilə tanınan, gürcü ictimaiyyətində azərbaycanlılığı özəlliklə tanıdan Gürcüstan Azərbaycanlıları Milli Konqresinin sədri Əli Babayevdir.
- Əli müəllim, Gürcüstan mətbuatında, televiziyalarında vaxtaşırı çıxış edirsiniz. Mövcud durum, soydaşlarımızın problemləri barədə danışırsınız. İndi Gürcüstanda yaşayan soydaşlarımızın, eləcə də Azərbaycan auditoriyası üçün fəaliyyətiniz barədə danışsanız yaxşı olar.
- Mən Gürcüstan Azərbaycanlıları Milli Konqrüsinin sədri olaraq 30 ildən artıqdır ki,  Gürcüstanın ictimai-siyasi həyatında fəal şəkildə fəaliyyət göstərirəm. Fəaliyyətimizin əsasını  Gürcüstanda yaşayan soydaşlarımızın Gürcüstan cəmiyyətinə inteqrasiya olunması, onların haqlarının müdafiəsi, dil, mədəniyyət və tarixi abidələrinin qorunması, savadlı gənclərimizin dövlət və hökumət strukturlarına cəlb olunması, sosial cəhətdən müdafiəsiz olan soydaşlarımıza yardım göstərilməsidir. Bütün bunlar 30 ildir ki,  bizim əsas vəzifəmizdir. 
- Əli müəllim, Azərbaycan dövlətinin Gürcüstanda olan soydaşlarımıza göstərdiyi yardım barədə nə deyə bilərsiniz?
- Azərbaycanın Gürcüstana dəstəyi həmişə yüksək səviyyədə olub. Bunu hər bir Gürcüstan vətəndaşı yaxşı hiss edir. “SOCAR”a  gəldikdə, Azərbaycan hökumətinin tapşırığı ilə Gürcüstanda yaşayan soydaşlarımıza dəstək olaraq bir çox sosial layihə həyata keçirilməkdədir.
-Əli müəllim, Azərbaycanın Diasporla İş üzrə Dövlət komitəsi barədə nə deyə bilərsiniz?Vaxtilə Ümummilli lider Heydər Əliyev onu yaradanda əsas diqqətin Gürcüstanda olan soydaşlarımıza yönəldilməsini, əsas yardımın onlara ayrılmasını, onların qayğısına qalınmasını ön plana çəkmişdi. İndiki komitə rəhbəri  barədə nə deyə bilərsiniz. Mühüm bir tədbirə, qurultayın keçirilməsinə hazırlaşırlar. Bu barədə siz nə bilirsiniz?
-46 ölkədə ictimai təşkilatlar, diasora fəaliyyət göstərir. Və hər bir bu diaspora təşkilatının rəhbəri bir-birilə görüşür, təcrübə mübadiləsi aparırlar. Yeri gəlmişkən həmin vaxtlar, Türkiyə və Azərbaycan diaspor təşkilatlarının bir-birinə yaxınlaşmasını unutmaq olmaz. Bu təşkilatların birlikdə fəaliyyəti  nəticəsində separatçı  erməni lobbisinin hərəkətlərinin qarşısı vaxtında alınırdı. Diaspora üzrə Dövlət komitəsinin dəstəyi ilə Gürcüstanda gürcü-Azərbaycan dilində qəzet çıxırdı,  saytlar yaradılmışdı. Kvemio Kartlidə gürcü dilinin  tədrisi üzrə kurslar keçirilirdi. Gənclərin Azərbaycana aparılaraq onunla daha yaxından tanış olmaq layihələri həyata keçirilirdi. Bu da Azərbaycan-Gürcüstan arasında dostluq münasibətlərinə öz töhfəsini verirdi. Əlbətdə ki, bununla Gürcüstanda yaşayan azərbaycanların problemləri bitmir. Bu problemlərlə biz də məşğul oluruq, bu iş bir növ bizim gündəlik fəaliyyətimizi əhatə edir. Azərbaycan Diasporla iş üzrə Dövlət Komitəsinin rəhbərliyi dəyişdiriləndən sonra bizim ümidimiz var idi ki, yeni rəhbər tərəfindən ciddi, qəti prinsipial addımlar atılacaqdı. Nəhayət, 4 ildir ki, Komitənin sədri olan Fuad Muradov və onun komandasının fəaliyyəti ürək açan deyil. Öz işlərinin öhdəsindən layiqincə gələ bilmirlər. İkinci Qarabağ müharibəsinin qələbəsi bütün dünya azərbaycanlılarının qələbəsidir. Azərbaycanın şanlı ordusununun, onun ali baş komandanı İlham Əliyevin böyük qələbəsidir. Diasporla İş üzrə Dövlər Komitəsi Gürcüstanda bu müharibə ilə əlaqədar diplom və medallar  paylamaqla məşğul idi. Bu günlərdə belə bir informasiya bizə çatır ki,  aprelin 21-dən 25-dək Azərbaycanın mədəniyyət paytaxtı Şuşada Diasporla İş üzrə Dövlər Komitəsi tərəfindən Dünya Azərbaycanlılarının qurultayı keçirilir.
Fuad Muradovun rəhbəri olduğu Diaspor Komitəsi aprelin 23-də dünya azərbaycanlılarının növbəti qurultayını keçirməyə hazırlaşır. Ancaq məsələnin ən maraqlı olan tərəfi budur ki, qurultaya hazırlıq işləri çox gizli aparılır. 
Bu dəfəki qurultaya dəvət olanlara Dispor Komitəsindən deyilib ki, Bakıya gəlib-getməklə bağlı bütün xərcləri dəvətlilərin özləri qarşılamalıdır. Bundan əvvəl keçirilən heç bir qurultayda belə şərt olmayıb.
Mən anlamıram , dünya azərbaycanlıları üçün böyük önəm daşıyan bu cür hadisələr niyə belə gizlin həyata keçməlidir?
Onu da qeyd edim ki, diaspor hərəkatında ciddi xidmətləri olan bir çox tanınmış şəxslər keçiriləcək  qurultaya dəvət almayıblar. Bəs onda qurultaya kimləri dəvət edib? Eşitdiyimə görə, qurultayın  Şuşa festivalı adı altında keçirilməsi planlaşdırılmışdı. Fuad Muradov bildiyimə görə, ilin əvvəlindən komitə tərəfindən  bu il heç bir lahiyyənin maliyyələşdirilməyəcəyini söyləmişdi. Səbəbini də  bütün maliyyə vəsaitinin sözügedən qurultaya sərf olunduğunu göstərmişdir. 
Diasporla İş üzrə Dövlər Komitəsi formal tədbir keçirib pul silməklə məşğuldur. Məsələn,  bayraq altında yürüş, mənasız konsertlər təşkil etməkdir. Əvəzində külli miqdarda pul silinir. Biz təklif verə bilərdik ki, Gürcüstanlı gənc soydaşlarımızın Azərbaycana səyahətini təşkil edilə və onlar qələbənin nəticələri ilə yaxından tanış ola idilər. Bu qurultay qələbə qurultayı olmalıdır . O yox ki, qələbədən uzaq olan insanların qurultayı. Mən Azərbaycan prezidenti cənab İlham Əliyevə, vitse-prezidenti Mehriban xanım Əliyevaya, Baş nazir Əli Əsədova müraciət etmək istəyirəm ki, ciddi komissiya yaratsınlar, diaspor üzrə dövlət komitəsinin fəaliyyəti araşdırılsın. 
Ümummilli lider Heydər Əliyevin xeyir-duası ilə yaradılan  Komitənin sədri Gürcüstanda fəaliyyət göstərən cəmiyyətlərin birləşməsinə deyil, parçalanmasına nail oldu. Marneulidə yaradılan İnteqrasiya mərkəzinin sön dövrdə 3 rəhbəri dəyişdirilib. Onların apardığı iş cəmiyyətə məlum deyil. Fuad Muradov tərəfindən  yaradılan diaspor fonduna böyük ümidimiz var idi. Biz layihələr göndərmişdik, ancaq heç biri də qəbul edilmədi. Səbəbini də bizə demirlər. Tiflis şəhərində yerləşən cəmiyyətimiz diaspora ilə İş üzrə dövlət komitəsindən heç bir maddi dəstək almayıb. 
Bütün bunlara baxmayaraq Konqresimiz öz işini uğurla davam etdirir. Yüzlərlə  soydaşlarımızın  hüququnun müdafiəsi ilə bağlı uğurlarımız var. Gürcüstanın televiziya və agentliklərdə soydaşlarımızın çıxışını təmin etməklə onların problemini ictimailəşdiririk. 2020-ci ildə  44 günlük Qarabağ müharibəsi ilə əlaqədar Gürcüstanın mərkəzində 24 saatlıq informasiya mərkəzi yaratmışdıq. Azərbaycanın nailiyyətləri gürcü ictimaiyyətinə çatdırılırdı. Gürcüstanın tanınmış ekspertlərinə gürcü dilində operativ məlumatlar ötürülürdü. Marneulidə müharibənin qələbəsinə dəstək mitinqinə Gürcüstanın müxtəlif  yerlərindən 700-ə qədər soydaşımız cəlb olunmuşdu. Azərbaycanın milli maraqlarının gürcü cəmiyyətində ifadə olunması və Gürcüstandakı soydaşlarımızın hüquq və maraqlarını bundan sonra da qorumağa davam edəcəyik.
Mirzə Məmmədoğlu
Sozcu.info


Oxşar Xəbərlər

Xəbər lenti


{sape_links}{sape_article}