Mənəviyyatsızlıq o həddə çatıb ki, icra hakimiyyəti orqanları, bələdiyyələr dədə-babalarının uyuduğu qəbiristanlıqları da tamahlarına qurban ediblər. Ağsu rayonu, Pirhəsənli kəndinin qəbristanlığında hazırkı icra başçısının peyğəmbər nəslindən olan atası Mirqasım Ağanın ruhu indi qan ağlayır. Qəbristanlığın üstündəki sahədə qonşu kəndin icra nümayəndəsi Asif adlı şəxs obyekt tikintisinə başlayıb və rayonun icra başçısından sahəni satın aldığını bildirib. Bu mənəvi alçaqlığa etiraz olaraq kənd camaatı Pirhəsənli kənd icra nümayəndəliyinin qarşısında toplaşmaq qərarına gəliblər. Eyni zamanda, qanunsuz, mənəviyyata zidd tikintinin aparılmasına maneçilik törədən kənd sakinləri icra hakimiyyəti orqanlarından qəbir alverinə son qoymağı tələb edirlər.

Ağsuda, özəlliklə Pirhəsənli kəndində yas məclisləri Mirqasım Ağaya özəl salavatla başlayır və bu gerçək Allah adamının, Peyğəmbər övladının anımı ilə başa çatır. 10 ildir atasının yanında uyuyan Ağanın böyük oğlu Mirkazım Ağa da sağlığında həmin sahənin satıla, bölünə bilməzliyini vurğulamışdı. Hazırkı icra başçısı isə qəbir-yurd yerlərini tamahına qurban verməkdə davam edir. ..

Məğrur Bədəlsoy