Ermənistan və Azərbaycan arasında sərhəd xəttinin müəyyən edilməsindəki ciddi problemlərlə bağlı dünyanın bir çox nüfuzlu media orqanları məlumat yayıb.
Qərbə bağlı “eurasianet.org” saytında gedən “In southern Armenia, warily sizing up the new neighbors” (Ermənistanın cənubunda yeni qonşulara ehtiyatla yanaşırlar) adlı geniş məqalədə bu məsələdən söhbət açılır. Qeyd edilir ki, Zəngilan rayonun Qazançı kəndinin qonşuluğundakı Nerkin Hand adlanan erməni kəndində yaşayanlar xeyli məyusdur.


Bu kənd Azərbaycanla sərhəddən cəmi 200 metr aralıdadır. Onlar sərhəddə dayanan Azərbaycan əsgərləri ilə əlaqə saxlamaqdan çəkinirlər. Ancaq onların arasında elə bir problem də yoxdur. Saytın yazdığına görə kənd sakinləri deyirlər ki, onlar narahat yatırlar:

“Hər şey elə bil tükdən asılıdır. Hər an vəziyyət nəzarətdən çıxa bilər”. Kənd sakinlərindən bir deyir ki, 1 il əvvəl isə hər şey başqa cür idi. İndi azərbaycanlılarla üz-üzə qalmışıq. Bu narahatlıqdan dolayı kənd sakinlərinin bir çoxu ərazini tərk edib. Onlar daha təhlükəsiz yerdə yaşamağa üstünlük verirlər.
Sayt bildirir ki, hər iki ölkə sərhəd xəttinin müəyyənləşməsi üçün Sovet dövründəki xəritələrə istinad olunmasına razılıq verib:

“Artıq Azərbaycan tərəfi həmin xəritələrə istinadən bəzi yerlərdə hərbi postlar qurub. Elə erməni kəndi var ki, onun həndəvərində Ermənistan, Rusiya və Azərbaycan bayrağı dalğalanır. Bu isə ermənilərin xoşuna gəlmir. Məsələn, Aravus Laçın rayonu yaxınlığındakı erməni kəndidir. Sakinlər deyirlər ki, qarşıdakı otlaq ərazi bizimdir. Ancaq Azərbaycan tərəfi “Google Maps”ə əsasən həmin ərazilərə əl qoyub. Jurnalist yazır ki, biz “Google Maps”ə baxdıq. Ermənilərin “bizimdir” dediyi həmin ərazi Azərbaycanın tərkibində göstərilib.


Sayt qeyd edir ki, ermənilər arasında “Google Maps”ə ciddi inamsızlıq var. Onlar hesab edir ki, Azərbaycan “Google Maps”i satın alıb.

Qeyd edək ki, “Google” dünya miqyasında “Apple” və “Amazon”dan sonra ən bahalı şirkət hesab olunur. Qiyməti 1 trilyon dollara yaxındır. Belə bir şirkəti satın almaq mümkünsüz görünür. Sadəcə, “Google Maps” keçmiş Sovet xəritələrinə əsasən Ermənistanla Azərbaycan ərazisindəki sərhədləri təqdim edir. Ermənilər “Yandex”, “Apple” və “Open Street Map”ə üstünlük verirlər. Çünki onlar bəzi Azərbaycan ərazilərini Ermənistanın tərkibində göstərirlər.

O da bəllidir ki, xəritə məsələsində “Google Maps” ən mötəbər qaynaq hesab olunur. Rəsmi statistikaya görə, Amerikaya bağlı bu qurumdan hər ay 1 milyard insan istifadə edir. Rusiyaya məxsus “Yandex” isə o qədər də populyar deyil. Rəsmi məlumata görə, hər ay Rusiyada 11.5 milyon nəfər “Yandex”in xəritə bölümündən istifadə edir. Dünya üzrə isə 20 milyon nəfər “Yandex”in xəritələrinə üz tutur.