“Ölkə başçısı İlham Əliyevin və Birinci vitse-prezident Mehriban xanım Əliyevanın ən çox diqqət etdiyi sahələrdən biri orta təhsildir. Ölkəmizdə inşa edilən və yüksək infrastruktura malik olan məktəblər, bu təhsil müəssisələrindəki şərait şagirdlərin həm yüksək səviyyədə bilik qazanmalarına, həm də yaxşı vətəndaş kimi yetişmələrinə xidmət edir. Aydındır ki, bunun məsuliyyətini isə təhsilə cavabdeh şəxslər daşımalıdırlar. Məktəblərdəki yeniliklərlə yanaşı, nöqsanlar da mütləq ictimailəşdirilməlidir”.

KONKRET.az xəbər verir ki, bu fikirləri millət vəkili Etibar Əliyev səsləndirib. O, təhsilin bütün pillələrini, xüsusilə orta təhsili qorumağın vacib olduğunu bildirib: “Məktəbdən gələcəyimizə yol açılır. Son zamanlar orta təhsildə baş verən neqativ hallarla bağlı tənqidi yazılarım bir sıra şəbəkə adamlarını hiddətləndirib. Orta məktəblərə 5-ci kalonun nüfuz etməsində məqsəd məktəblə cəmiyyət arasında qarşıdurma yaratmaqdır. Bu qruplaşmanın başında duranlardan biri Təhsil nazirinin keçmiş müavini Məhəbbət Vəliyevadır. Bakı məktəblərinin idarəçiliyi hələ də onda qalır. Bakı şəhəri Təhsil İdarəsinə təyin etdirdiyi Mehriban Vəliyeva onun təsiri altındadır və Məhəbbət Vəliyevanın diqtəsi ilə idarə edir”.

Etibar Əliyev bu şəbəkələşmiş antimilli qruplaşmanın (deputat özü bu cur adlandırıb) məktəblərimizə vurduğu zərbələrə diqqət çəkib:

-Regional Təhsil İdarələri, xüsusilə Bakı şəhər Təhsil İdarəsi intriqa yuvasına çevrilib. Baxçalar bu quruma tabe etdirildikdən sonra müdirlərdən külli miqdarda pul yığımına başlanıb.

-Orta məktəblərin yuxarı siniflərində demək olar dərslər keçirilmir.

-Məktəblər repetitorlara arendaya verilib.

-Bioqrafiyaları ən natəmiz olan adamları direktor təyin etdirirlər.

-Məktəb qrant layihələrinə ayrılan külli miqdarda vəsaitlər mənimsənilir.

Məhəbbət Vəliyevanın direktor təyin etdirdiyi bütün məktəblərdə özbaşınalıq və rüşvətxorluq tüğyan edir. Bunu bütün Respublika bilir. Məktəblərdə pul yığımları günü-gündən şiddətlənir. Şəbəkəyə yaxın olan məktəb direktorları üçün yaş həddi yoxdur və həmin təhsil müəssisələrinə nəzarət həyata keçirilmir. Məktəblərdə kasıb uşaqlarına ögey münasibət bəslənilir. Bu neqativ halları statusundan asılı olmayaraq kimsə tənqid edəndə Məhəbbət Vəliyeva və onun klan üzvləri: ramizmehdiyevçilər, əlihəsənovçular və Azərbaycanın əleyhinə olan antimilli şəbəkə işə salınır. Bu antimilli şəbəkə və onların əlaltıları 164 nömrəli məktəbdə “Georgi lenti” kimi antiideoloji və Dövlətçilik əleyhinə olan tədbirə reaksiya vermədilər. Son hadisəyə qayıdıram. Zərifə Əliyeva adına liseyin direktorunun iştirak etdiyi əyləncə tədbirində öz müəllimlərini qarşısında oriyental rəqs etdirməsi görüntüləri geniş rezonansa səbəb oldu. Bu şəbəkə müəllim adına yaraşmayan hərəkətlərə bəraət qazandırmağa başladı. Mən həmin videonu sosial şəbəkələrdə gördükdən sonra bununla bağlı bir cümləlik şərh yazdım. Hətta videogörüntünü belə paylaşmadım. Bundan sonra Məhəbbət Vəliyevanın mütəşəkkil dəstəsi mənə qarşı böhtan və qarayaxma kampaniyasına başladı. Başladılar özlərində olmayan ali mənəvi dəyərlərdən dəm vurmağa. Gödənini milli dəyərlərindən üstün tutanlar bu millətin düşmənləridir”.

Millət vəkili əlavə edib ki, bu bədbəxtlər və satılmışlar müəllimin məktəbdəki davranışı ilə kənardakı rəftarının eyniyyət təşkil etməli olduğunu bilmirlər: “Müəllim hər yerdə şəxsi nümunə olmalıdır. Bütün ölkə bilir ki, həmin məktəbin direktor əvəzi dəstəbaşı Məhəbbət Vəliyevanın əmisi qızıdır. Deyilənlərə görə o, əmisi qızını qorumaq üçün ramizmehdiyevçilərə və əlihəsənovçulara xeyli məsrəflər sərf etdi. Hətta bunları xaricdə oturmuş, Azərbaycana qarşı siyasi qarayaxma aparan 5-ci kalonun üzvləri də müdafiə edir. İndi görün, Məhəbbət Vəliyeva kimlərlə bir çətirin altındadır. Və onun oyunları həm də siyasi xarakter daşıyır. Elm və təhsilin əlifbasına həsrət qalanlardan birinin vicdan asqırtısına isə Nazirlik rəsmiləri də diksindi. Ona görə ki, bu şəbəkə onun arvadını imtahansız direktor təyin edib. Bu ciddi qanun pozuntusuna razılaşan yaramaz, indi bizə əxlaq dərsi keçir. Liseyin tarix müəllimi, lisey direktorunun yaxın sirdaşı, liseydəki yığım kampaniyasına rəhbərlik edənlərdən biri, həmkarların sədri Pərviz Ağalarov etiraf edə bilmir ki, biz liseyimizi digər lisey və məktəblər kimi repetitor kurslarına çevirmişik. Bunu ibtidai sinif şagirdləri də bilir. Bu liseyə qəbulun qiyməti barədə bütün Respublika danışır və “vicdanlı” tarixçi isə direktora qahmar çıxır. Haşiəyə çıxıb deyə bilərəm ki, hal-hazırda bu kampaniyanın ən qızğın dövrüdür. Aidiyyəti hüquq mühafizə orqanlarına bu məsələni nəzarətə götürməyə dəvət edirəm. Kişilikdən, qeyrətdən dəm vuran bu adam qalmaqallı 10-ci sinif “Tarix” dərsliyinin müəlliflərindən biridir və “Velikaya Armeniya” xəritəsi olan bölməni məhz o yazıb.” Görün nə işlə məşğuldurlar. Partiyaların birində şair və redaktor işləyən, savadsız “Əməkdar jurnalist”, görkəmli əlihəsənovçunun yazdığı əxlaqsız bir yazını Mehriban Vəliyeva çoxaldıb paylayır”.

Deputat çıxışını belə yekunlaşdırıb: “5- ci kolonun üzvlərinə, mehdiyevçilərə və həsənovçulara xəbərdarlıq edirəm! Caynağınızı Azərbaycan təhsilindən çəkin… Bu dövlətin gələcəyi bu gün məktəblərdə bacardığınız qədər səhf istiqamətə yönəltməyə çalışdığınız gənclərdən asılıdır. Unutmayın ki, dövlət də, ayrı-ayrı dövlət strukturları da bunun ciddi şəkildə fərqindədirlər. Və mən də bütün təzyiq və qarayaxmalara baxmayaraq həmişə bu neqativ və gələcəyimiz üçün təhlükəli olan proseslərin qarşısında olacam və mübarizəmdən geri çəkilməyəcəm”.

Müşviq Tofiqoğlu