Hərbi əməliyyatlar başladığı gündən bu yana Ermənistanın Azərbaycana qarşı geniş miqyasda informasiya müharibəsinin miqyası daha da böyüyüb. Düşmən ölkəmizə qarşı qaralama kampaniyasının sərhədlərini böyüdüb. Erməni yalan maşını ilk gündən iddia edir ki, Azərbaycan xaricdən silahlı muzdlular gətirib.

Bu tezisin əsas xətti ondan ibarətdir ki, Türkiyə Suriyanın şimalından islamçı cihadçıları Azərbaycana gətirib Qarabağda savaşdırır. İlk baxışdan absurd görünsə də, bu tezislə ermənilər yalnız Azərbaycana qarşı deyil, həm də Türkiyə ilə savaşdıqları, islamçı cihadçılarla üz-üzə olduqlarını göstərməyə çalışırlar. Aydın məsələdir ki, hazırda Yaxın Şərqdə və Avropada Türkiyəyə qarşı olan ölkələr və qrupları bu şəkildə öz tərəflərinə çəkməyə çalışırlar. Digər tərəfdən isə dünyanın müxtəlif ölkələrindən gəlib Ermənistanda Azərbaycana qarşı vursan muzdlular faktını ört-basdır etməyə çalışırlar.

Məlum olduğu kimi, hazırda Suriya, İraq, Livan, Yunanıstan və digər ölkələrdən gələn muzdlular Azərbaycana qarşı döyüşlərdə iştirak edir. Bu faktın ört-basdır edilməsi məqsədi ilə erməni təbliğat maşını sürəkli olaraq Azərbaycana qarşı saxta videolar hazırlayıb yayır.

Ancaq hələlik bu günə qədər erməni tərəfinin ortaya atdığı yalanlarla bağlı bir dənə də olsun ciddi fakt ortaya qoya bilməsə də, videolar xarici mediadakı erməni jurnalistlər və ermənilərlə əməkdaşlıq edənlər vasitəsilə tirajlanır.
Hərbi əməliyyatlar başlayandan Azərbaycan tərəfdən vuruşan suriyalı cihadçılar adı ilə yayılan videolarda hərbçilərin bir qayda olaraq Azərbaycan Dövlət Sərhəd Xidməti qulluqçularının geyiminə bənzər kamufulyajda olmaları və bir-birinə bənzəmələri diqqət cəlb edib.

Hətta bu cür videolardan birini Nikol Paşinyan öz səhifəsində yayıb. Lakin erməni yalan maşını o qədər sürətlə çalışır ki, çoxlu sayda səhvlər buraxır.

Məsələn, videoların birində ərəbcə danışan bir nəfər özünü suriyalı cihadçı kimi təqdim edir, şüarlar səsləndirir, daha sonra isə “bozqurd” işarəsi tutur. Əgər söhbət suriyalı cihadçıdan gedirsə, ermənilərin iddia etdiyi radikal islamçı cihadçı türk millətçilərinin simvolu olan “bozqurd” işarəsi tuta bilməz. Yox əgər türkməndirsə, o zaman ən azı bir cümlə türk dilində danışmalı idi.
Daha sonra yayılan başqa bir videoda isə yenə DSX formasına bənzər geyimdəki həmin “cihadçı” bu dəfə bir neçə nəfərlə birlikdə atəş açır. Lakin bu yerin hara olduğu, avtomobillərin nömrə nişanı görünmür.


Ən maraqlısı isə odur ki, hər iki videodakı əsas sima eyni şəxsdir. Daha dəqiqi, erməni yalan maşını üçün “Azərbaycana gətirilmiş cihdaçı” obrazını canlandıran aktyor.

Ötən gün Laçında çəkildiyi iddia olunan Ermənistan müdafiə nazirinin yanında əyləşən ayaqyalın erməni əsgərin Azərbaycan Dövlət Sərhəd Xidmətinin hərbi geyimi ilə eynilik təşkil etməsi “cihadçıların” sirrini qismən də olsa açdı. Yəni belə aydın olur ki, bu formalar ermənilərdə var və bundan istifadə edirlər.

Ermənistan tərəfinin saxta video hazırladığını göstərən daha bir fakt isə “azərbaycanlı əsir” şousu zamanı ifşa olundu. Oktyabrın əvvəlində bir neçə gün fasilə ilə sosial şəbəkələrdə yayılan “əsir azərbaycanlı əsgər” videosunun eyni adam olduğu üzə çıxdı. Daha sonra o da məlum oldu ki, Azərbaycan ordusunda belə bir hərbçi yoxdur, əsir rolunu erməni oynayır. Amma artist zəif olduğu üçün rolunun öhdəsindən yaxşı gələ bilmir.