Azərbaycanın Ermənistanın təcavüzkar siyasətinə qarşı başladığı Vətən müharibəsində ordumuz xeyli uğurlar əldə edib. Ölkədə siyasi rəhbərliyin qətiyyətli siyasəti, düşmən qarşısında qazandığı zəfərlər, dəyişməz iradə ölkəmizin beynəlxalq imicinə də müsbət təsir edib. Artıq açıq-aşkar dəstək göstərənlər az olsa da, neytral mövqe nümayiş etdirənlərin sayı artıb, Ermənistanı dəstəkləyənlər ciddi şəkildə azalıb. Azərbaycan Ordusu Dağlıq Qarabağ problemini birdəfəlik həll etməklə, ölkədəki 30 illik müharibə vəziyyətinə də son qoymaq istiqamətindədir. Bəs görəsən, bu müharibə dövrü və ardından torpaqlarımızın azad edilməsi , ölkənin iqtisadiyyatına, xüsusən də son dövrlər mühüm əhəmiyyət kəsb edən xarici investisiya mühitinə necə təsir göstərəcək?
Ekspertlər hesab edir ki, hərbi əməliyyatların aktiv dövrü investorları çəkindirsə də, Dağlıq Qarabağda qələbənin əldə edilməsi, ərazi bütövlüyümüzün bərpası və ölkənin müharibə vəziyyətindən çıxmasından sonra investisiya mühiti daha cəlbedici olacaq.
İqtisadçı alim , sabiq maliyyə naziri Fikrət Yusifov “Yeni Müsavat”a açıqlamasında vurğuladı ki, münaqişə başa çatdıqdan və Azərbaycan öz ərazi bütövlüyünü tam təmin etdikdən sonra bu, bütövlükdə beynəlxalq aləmdə də Azərbaycanın imicinə müsbət təsir edəcək: “Bu münaqişə bu günə qədər investorları, iş adamlarını ölkəmizə gəlməkdən çəkindirirdi. Hansısa iş adamları gəlsə belə, risk etdiyini düşünürdü. Ancaq bu gün ölkəmizin ərazi bütövlüyü təmin edildikdən sonra bu düşüncələr ortadan qalxacaq, hər kəs çox məmnuniyyətlə Azərbaycana investisiya yatıracaq. Müharibə bitəndən və biz torpaqlarımızı tam şəkildə geri qaytardıqdan sonra, ərazi bütövlüyümüzü tam təmin etdikdən sonra investisiya mühitinin yaxşılaşdırılması istiqamətində görülən işləri daha da sürətləndirməli,  geniş miqyasda təbliğat işi aparmalıyıq, münbit şərait yaratmalıyıq. Dəfələrlə ölkə rəhbərliyinin çıxışlarında da səsləndi ki, bəzən yerlərdə məmurların, icra başçılarının sahibkarların fəaliyyətinə müdaxilələri var, bir çox neqativ hallar baş verdi. Onların aradan qaldırılması da baş verəcək”.

Fikrət Yusifov: “Biz müharibədən sonra investisiya mühitinə əngəl olan bütün maneələri də aradan qaldırmalıyıq”
F.Yusifovun fikrincə, müharibədən sonra iqtisadi islahatlar da aparılsa , Azərbaycan investisiya yatırımı üçün bölgənin ən münbit ölkələrindən biri olacaq: “O zaman ölkəmizə investisiya axınları əvvəlkindən qat-qat çox olacaq. Bir şərtlə ki, biz müharibədən sonra investisiya mühitinə əngəl olan bütün manaələri aradan qaldıraq. Özümüzü aldatmayaq, investisiya mühiti ilə bağlı çox sayda problemlərimiz var. Son illər bu istiqamətdə xeyli işlər görülsə də, problemlər qalmaqdadır. Ümumiyyətlə, dünya təcrübəsində belə bir məqam  var ki, hər bir ölkənin iqtisadi inkişafı ona yatırılan investisiyaların, xüsusən də xarici investisiyaların həcmindən birbaşa asılı olur. İqtisadi inkişaf sürəti investisiyaların həcmi ilə adekvatdır. Ona görə də biz maneələrin aradan qaldırılması ilə bağlı düşünməliyik. Məmur özbaşınalığına son qoyulmalıdır. Xarici investorlara indikindən daha çox güzəştlər tətbiq edilməlidir. Başlanğıc mərhələdə bu çox önəmlidir”.
İqtisadçı ekspert Natiq Cəfərli də vurğuladı ki, Azərbaycanda xarici investisiyaların cəlb olunması məsələsi təkcə Qarabağın işğal faktoru , müharibənin alovlanması, Ermənistanın işğal faktoru ilə bağlı deyil: “Təbii ki, bunun da təsirləri var idi. Müharibə vəziyyəti investorlar üçün çəkindirici faktorlardan biri idi, ancaq əsas məsələ daxildə oyun qaydalarının daha da şəffaflaşması ilə əlaqədardır. İnvestorları maraqlandıran bir çox məsələlər var ki, onlarla bağlı qərarlar verilməlidir, hüququn aliliyi, Rəqabət Məcəlləsinin qəbulu, investisiyanın qorunması və sair buraya daxildir. Müharibə torpaqlarımızın azad olunması ilə bitdikdən sonra Azərbaycanda investisiya mühiti xarici iş adamları üçün daha cəlbedici olacaq”.

Samir Əliyev: “Müharibənin tez zamanda, özəlliklə də Azərbaycanın xeyrinə bitməsi bizim üçün çox vacibdir”
İqtisadçı ekspert Samir Əliyev isə qeyd etdi ki, istənilən ölkədə gedən müharibə o ölkənin investisiya mühitinin sabitliyini şübhə altına alır: “Hazırda müharibənin getməsi Azərbaycanı investisiya baxımından bir o qədər də cəlbedici etmir. Ümumiyyətlə, beynəlxalq  reytinq agentlikləri Azərbaycanla bağlı, onun şirkətləri ilə, bankları ilə bağlı reytinqləri müəyyənləşdirəndə qeyd edirlər ki, reytinqin pisləşməsinə təsir edən amil kimi həmişə birinci Dağlıq Qarabağda müharibənin qızışmasını qeyd ediblər. Bu baxımdan bu proses Ermənistanın kredit reytinqinə mənfi təsir göstərə bilər. Azərbaycana təsirləri də istisna deyil, baxmayaraq ki, biz artıq torpaqlarımızı azad edirik və müharibə təhlükəsi bizdən bir qədər uzaqlaşır. Ermənilərin bizim əraziyə raket atması vəziyyəti dəyişir. İnvestor üçün kimin qalib, kimin məğlub olması əsas deyil, onun üçün əsas olan iqtisadi sabitlikdir. Bu gün Azərbaycanda iqtisadi vəziyyət sabitdir, Neft Fondunun vəsaitləri bizdə reytinqi dəstəkləyən amil kimi götürülür. Müharibə şəraiti reytinqi pisləşdirsə də, Neft Fondu reytinqi dəstəkləyir. Bu baxımdan Azərbaycanda iqtisadi sabitlik var, manatın məzənnəsi sabitdir, hər hansı iqtisadi gərginlik yoxdur. Müharibə ölkədə siyasi gərginliyə gətirib çıxartmayıb. Ona görə reytinqlərimizlə bağlı hazırda ciddi risk yoxdur. Ancaq nəzəri olaraq qeyd edək ki, müharibə uzun çəkərsə, vəziyyət dəyişərsə, o zaman mənfi təsir edə bilər”.
İqtisadçının sözlərinə görə, reytinq məhz xarici investorlar üçündür ki, onlar buna baxıb ölkəyə investisiya qoyub-qoymamaq barədə düşünürlər: “İnvestora ilk növbədə pulunu itirməmək vacibdir, sabitlik önəmlidir. Müharibənin tez zamanda, özəlliklə də Azərbaycanın xeyrinə bitməsi bizim üçün çox vacibdir. Bu mənada aktiv  hərbi əməliyyatlar  davam etdikcə, yəqin ki, investorlar istər Azərbaycan, istərsə də Ermənistanla bağlı gözləmə mövqeyi tutacaqlar”.