Bu fikirlər "Azərişıq” ASC-nin sədr müavini Ramil Yusifov və Perspektiv inkişaf və "ASAN xidmət”lə iş idarəsinin rəisi Elsevər Rüstəmlinin "Elektron hökümətlə bağlı "Azərişıq” ASC-də həyata keçirilən yeniliklər, bunun sahibkarlıq obyektlərinin elektrik şəbəkəsinə qoşulması və digər xidmətlərdə rolu” mövzusunda 220 saylı yarımstansiyada keçirilən mətbuat konfransında səslənib.

Bildirilib ki, sahibkarlıq obyektinin elektrik şəbəkəsinə qoşulması üçün "ASAN xidmət” və ASAN kommunal” vasitəsi ilə "Azərişıq” ASC-yə 2018-ci ilin əvvəlindən bu günə kimi 1000-ə yaxın müraciət daxil olub ki, onların da 500-dən çoxu məhz elektron qaydada edilib. Sahibkarların "ASAN xidmət” və "ASAN kommunal” mərkəzləri vasitəsi ilə Səhmdar Cəmiyyətə müraciət etməsinə və xüsusən bunun elektron qaydada həyata keçirilməsnə "Azərişıq” ASC xüsusi olaraq maraqlıdır.

Odur ki, 500-dən yuxarı sahibkarın elektrik şəbəkəsinə qoşulmaq üçün məhz elektron qaydanı seçməsi aparılan təbliğatın özünü doğrultmasının və eyni zamanda həyata keçirilən islahatların nəticə verməsinin göstəricisidir. Nəzərə çatdırılıb ki, son aylarda sahibkarlıq obyektlərinin elektrik şəbəkəsinə qoşulması üçün köklü şəkildə yeniliklər edilib. Belə ki, artıq yerləşdiyi rayonundan asılı olmayaraq ölkədəki bütün sahibkarlar "ASAN” xidmət və "ASAN” kommunal mərkəzlərinə müraciət edərək obyektlərini elektrik şəbəkəsinə qoşdura bilirlər.

Eyni zamanda elektrik şəbəkəsinə qoşulmaq üçün vahid pəncərə sistemi üzrə prosudurlar 7-dən 3-ə salınıb, ən əsası isə şəbəkəyə qoşulma müddətin 69 gündən 24 günə endirilib. Həmçinin texniki şərtlərin verilməsi prosesində "Azərişıq” ASC-nin elektron xəritəsinin imkanlarından istifadə olunmağa başlanılıb. Hazırda "ASAN xidmət” və ya "ASAN kommunal” mərkəzlərinə müraciət daxil olan kimi əraziyə getmədən, elə yerindəcə, elektron xəritədə dərhal məkanın coğrafi mövqeləri təsbit edilir, ona ən yaxın məsafədəki, güc mənbəyi müəyyənləşdirilir, texniki məlumatlar analiz olunur. Həmçinin müraciətdə göstərilən obyektin şəbəkəyə qoşulmasının mümkünlüyü təyin edildikdən sonra trassa müəyyənləşdirilərək, məsafə elektron xəritə üzərində ölçülür və bilavasitə ərazidə iş planı layihələndirilir. Sifarişçi tərəfindən görüləcək işlərin dəyəri ödənilən kimi sənədləşmə işi tamamlanır. Bütün bunlar isə əhali abonentlərlə yanaşı sahibkarların işini asanlaşdırır, şəffavlığı təmin edir, insan faktorunu aradan qaldırır.

Hazırda isə "Azərişıq” ASC-də Prezident İlham Əliyevin bu ilin mart ayının 14-də imzaladığı "Elektron hökumətin inkişafı və rəqəmsal hökumətə keçid ilə bağlı tədbirlər haqqında” Fərmana uyğun olaraq ciddi işlər həyata keçirilir. Belə ki, elektron xəritə də daxil olmaqla Azərişıq ASC-nin digər elektron xidmətlərinin elektron hökümət portalına qoşulması üçün tədbirlər görülür. Daha dəqiqi "Azərişıq” ASC-nin informasiya sistemləri və ehtiyatlarının elektron hökümət portalı ilə əlaqələndirilməsi üçün kompanentlər yaradılır.

Bu səbəbdən də istismar müddəti bitməkdə olan informasiya texnologiyaları avadanlıqları daha müasir və yüksək parametrli avadanlıqlarlarla əvəzlənir, server, kompüter, şəbəkə və ümumilikdə maddi-texniki baza təlabata uyğun olaraq yenidən formalaşdırılır. Sözsüz ki, bütün bunlar nəticədə ölkə başçısının "Elektron hökumətin inkişafı və rəqəmsal hökumətə keçid ilə bağlı tədbirlər haqqında” Fərmana uyğun olaraq elektron hökümət portalı vasitəsi ilə istər sahibkarların, istərsə də əhali abonentlərin yerləşdiyi coğrafi məkandan asılı olmayaraq daha çevik informasiya almasına, sosial xidmət təminatında dövlət qulluqçuları ilə vətəndaşlar arasında olan təmasın aradan qaldırılmasına, həmçinin prosedurları sadələşdirməyə və şəffalığa xidmət edəcək.