Bakıda tanışını aldadaraq külli miqdarda pulunu ələ keçirən makler və dostu barədə prokurorluğa şikayət edilib. Amma barələrində şikayət olunan şəxslər pulu ödəmir. Bu azmış kimi, onlar azadlıqda öz işlərini davam etdirirlər.
Sozcu.info xəbər verir ki, bu iş üzrə zərərçəkmiş şəxs Azad Qəribovdur. Onu aldadan şəxs isə keçmiş iş yoldaşı Murad Abdullayev və onun qohumudur.
Azad Qəribov deyir ki, Murad ona iş görməyi təklif edib. İş isə torpaq sahəsi alaraq orada fərdi yaşayış evi tikmək olub. Tərəflər tikilən evi sataraq qazanc əldə edəcəklərmiş:
“Mənim bu işlə məşğul olmağa vaxtım yox idi. Pulu mən qoyacaqdım, evi də Murad tikdirəcəkdi. Razılaşdıq, torpaq alındı, ev tikildi. Razılığımıza əsasən ev satılanda 30 faiz qazanc olaraq Murada çatacaqdı. Ona hissə-hissə ümumilikdə 55 min manat pul vermişəm. Binəqədidə “DSK yolu” Yeni yaşayış massivində 2 sot torpaq aldı və ev tikildi. Ev 2021-ci ilin iyul ayında tamamlandı. Evi satışa qoymaq mərhələsinə çatanda aldadıldım”.
Azad Qəribov deyir ki, Murad evi tanışı, həm də qohumu olan Şöhrətə satmağı təklif edib:
“Evin qiymətini 63 min manat kimi müəyyənləşdirdik. Murad dedi ki, Şöhrətdən min manat beh alıb. Pulun 62 min manatını 2021-ci ilin avqust ayının sonuna qədər hissə-hissə olmaqla verəcəkdi. Bu zaman mən Murada Şöhrətdən mənsiz pul almamasını tapşırdım. Həmin ərəfədə Murad xahiş etdi ki, evi Şöhrətin qızının adına keçirək. Çünki Şöhrət qızını həmin evə köçürəcəkdi. Mən də insanlıq edib razılaşdım.
Evi Şöhrətin qızının adına keçirdik. Şöhrətə də dedim ki, mənim xəbərim olmadan Murada pul verilməsin. Bu barədə ona səsli mesaj göndərmişəm. Amma bir müddət sonra Şöhrət mənə dedi ki, guya səsə qulaq asmayıb və Şöhrətə əlavə 37 min də pul verib. Murad da Şöhrətə deyib ki, bu barədə mənə məlumat verməsin. İkisi birləşərək mənə müxtəlif yalanlar dedilər. Bu azmış kimi, işi araşdıranda öyrəndim ki, evi 63 minə yox, 48 minə satıblar. Pulun 20 minini qaytarsalar da qalan məbləği müxtəlif bəhanələrlə qaytarmırlar”.
Aldadıldığını başa düşən Azad Qəribov hüquq-mühafizə orqanlarına müraciət edib.
Azad Qəribov dələduzluğa məruz qalması ilə bağlı Nərimanov Rayon Prokurorluğuna ərizə ilə müraciət edib.
“Dələduzluq cinayəti tam təsdiqlənsə də, ərizə üzrə 2 aylıq araşdırma aparıldı. Amma belə bir ağır cinayət əməli üzrə cinayət işinin açılması rədd edildi. Bildirildi ki, mülki məsələdir.
Bundan sonra çoxsaylı şikayət ərizələri yazdım. Nəhayət Bakı şəhər prokurorluğunda fakt üzrə Cinayət Məcəlləsinin 178.3.2-cü (dələduzluq: külli miqdarda törədildikdə) maddəsilə cinayət işi başlandı. 3-4 gün ərzində Murad Allahverdiyev, onun əlbir olduğu Şöhrət Axundov dindirildi və hər ikisi törətdikləri cinayəti etiraf etdi. Artıq aparılacaq istintaq hərəkəti yoxdur. Lakin müstəntiq Şahmar Qurbanovun və ona prosessual rəhbərlik edən Nərimanov Rayon Prokurorluğu məni aldadan şəxsləri həbs etmir, pulum da ödənilmir. Burada şəxsi marağın nə olduğunu bilmirəm. Məni aldadan şəxslər isə yenə də öz işlərini davam etdirirlər. Qurbanlar kəsərək başqa-başqa tikinti işləri görürlər.
İşimə laqeyd baxıldığı, şəxsi maraqların olduğunu düşündüyüm üçün baş prokuror Kamran Əliyevə müraciət etmişəm. Qanunların mənə verdiyi hüquqlara istinad edərək cinayət işinin istintaqının Nərimanov rayon Polis idarəsində aparılmasına qəti şəkildə etiraz edirəm”.
Məlumata görə, Murad Abdullayevin eyni əməllə başqa şəxslərdən də pul aldığı bildirilir.
Mövzu ilə bağlı prokurorluqdan bildirilib ki, Cinayət Məcəlləsinin 178.3.2-ci maddəsi ilə başlanmış cinayət işi üzrə hazırda Nərimanov Rayon Polis İdarəsinin İstintaq Şöbəsində intensiv istintaq tədbirləri həyata keçirilir.