Bakı şəhəri, Yeni Əhmədli, Qaçaq Nəbi küçəsi ev 5, 6 –cı blok, 106 – cı mənzildə yaşayan Haşımov Feyruz Eyvazəli oğlu tərəfindən

ƏRİZƏ
Hörmətli Prezident, həyatımda birinci dəfədir ki, Sizə müraciət edirəm.
Sizin Parisdəki mötəbər məclisdəki çıxışınıza böyük qürur hissi ilə baxdım. Allah –taala Sizi bu torpaq üçün çox görməsin, yolunuz nurlu, nəsibiniz zəfərlər olsun!
Hörmətli Prezident, 78 yaşım var, ömrümün qürub vaxtıdır, iyirmi ildən çoxdur ki, dövlətçiliyin ali məramları naminə mətbuatda psevdoemokratlara, Qarabağı siyasi qumara qoyanlara, kreslo hərislərinə, qondarma bəylərə qarşı amansız mübarizə aparmışam.
Xəstəliyə düçar olub normal yaşayışa, dərmana möhtac qalsam da peşiman deyiləm. İstirahət, bayram günləri istisna olmaqla gündə bir məqalə ilə çıxış etmişəm, iyirmi il ərzində aldığım qonorar yüz dollardan artıq olmayıb.İki dəfə reanimasiyaya düşsəm də, ağır günlər yaşasam da iqtidar mətbuatı üçün cavabdeh olanlardan nə diqqət gördüm, nə hörmət. İnciməmişəm…Siyasi macəraçılara qarşı yazdığım saysız – hesabsız məqalələrimin bircəciyini indi yağ-bal içində yaşayan “politoloqlar” yazmayıblar. Kefi bunlar çəkib (və çəkir də), məşəqqət və əzabı biz. Amma yenə də inciməmişəm.
Təsəllim, gündən günə gözəlləşən şəhərlərim, böyük quruculuq işləri, zəhmli qüvvəyə dönən ordum və bir də Sizin müdrik xarici siyasətinizdir.
Sizin xarici siyasət sahəsində böyük uğurlarınız olmasaydı, düşmənlərimiz rüşvətxor məmurların, satqın oliqarxların köməyilə Azərbaycanı İraqın, Liviyanın, ya da Suriyanın gününə salardılar.
Son vaxtlarda Sizin çörəyi dizi üstə olanlara, nakəslərə, azğınlara sərt üz göstərməyiniz, bəzi zinakarların qandanlanması hamının qəlbində ümid çıraqlarını təzədən yandırdı. Məmləkətdə elə adam yoxdur ki, Sizin üçün “Sağ olsun!” sözünü dilinə gətirməsin.
Amma təəsüflər olsun ki, istər özünün, istərsə də oğlunun qəbahətlərini nə vaxtsa yazdığı bəsit, bədii-publisistik dəyəri o qədər də yüksək olmayan “romanlarla”, mədhiyyələrlə, indi də orda-burda etdiyi konyukturaçı çıxışlarla ört-basdır etməyə çalışan Elmira Axundova kimi odioz fiqurlar ayıblarına kor olmurlar. Fəaliyyətinin çox sahələri indiyə qədər əməlli araşdırılmamış Elmira Axundova aldığı titul və imtiyazları sipərə döndərib oğlu Həbib Axundovu layiq olduğu məsuliyyətdən qoruyur.
Hörmətli Prezident, son bir ildə neçə-neçə qəzetdə, sosial şəbəkədə Elmira Axundovanın oğlu Həbib Axundovun əməllərini ifşa edən külli miqdarda material gedib. Deputat balası maliyyə fırıldağı quraraq neçə-neçə ailənin həyatını cəhənnəmə döndərmişdir. Pulları, var-yoxları əllərindən çıxmış insanlar respublikanın nüfuzlu təşkilatlarına dəfələrlə müraciət ediblər, ətraflı məlumatlar verilib, vacib dəlillər, sübutlar və təkzib edilməyən faktlar təqdim olunub.
Nüfuzlu qəzetlərdə, saytlarda Elmira Axundova və oğlunun bahalı maşınları, təmtəraqlı evləri, villaları barədə yetərincə danışılıb...
Amma nə olsun ki, bir orqan Elmira Axundovanın qorxusundan iki qara qəpiklik iş görməyib. Bu xanım özünü elə aparır ki, sanki bütün günahlar qapılara düşən, gündə ora-bura çağrılan, hədələnən, adam yerinə qoyulmayan, pulları əllərindən çıxmış, intihar həddinə çatdırılmış zavallılardadır. Onların ailə üzvləri bir müddət bundan əvvəl Sizə də üz tutub müraciət etmişdilər, amma bir xəbər çıxmadı.
Bütün varlığımla əminəm ki, Elmira Axundova və oğlunun pəstahları barədə Sizə dəqiq, qərəzsiz məlumat verilsə, vəziyyət bir anda dəyişəcək. Bütün xalq bilir ki, Siz heç bir vaxt simsarsız, köməksiz qalmış insanların dərdinə biganə qalmamısınız.
Elmira Axundova ictimaiyyətin diqqətini yayındırmaq, özündən, oğlundan böhtan qurbanı, cəfakeş obrazı yaratmaq üçün məni, qoca veteranı məhkəməyə verdi. Guya mən onu məqalələrimlə təhqir etmişəm, elə buna görə də üzr istəyib, yüz min manat da cərimə verməliyəm. (Məhkəmə sonra bu yüz mini beş min manata endirdi!)
Hörmətli Prezident, Sizin məmur balalarının harınlığına, azğınlığına münasibətinizi xalq bilir. Mən də yazmışam ki, məmləkətin indiki durumunda məmur balalarının harınlığı əsl xəyanətdir, bunlar firavan həyatlarını, bahalı maşınlarını sosial şəbəkədə nümayiş etdirməklə kasıb-kusubu təhqir edir, Prezidentin sözlərinə məhəl qoymurlar, iqtidarla xalq arasında qəsdən uçurum yaradırlar.
Daha sonra Elmira Axundovadan soruşmuşdum ki, o hansı qonorarların hesabına neçə-neçə imarət ucaldıb, mənzillər alıb, beş bahalı maşın saxlayır. Niyə müvafiq orqanlar Elmira Axundovadan soruşmurlar ki, deputat maaşı ilə nə cür olub ki, belə cah-cəlalı qurub? Londondan vurub Dubaydan çıxan oğlu nə vaxt xalqın pulunu qaytaracaq?
Hörmətli Prezident, heydən düşmüşəm, nə dərmana pulum var, nə əməlli müalicəyə, bununla belə əmrinizə müntəzirəm. Ümummilli cihad elan etdiyiniz saatda balalarımla bircə Vətən yolunda vuruşmağı, həlak olmağı özümə səadət, şərəf sayacağam.
Amma Elmira Axundova kimilər “gül balalarını” bir bəhanə ilə ölkədən çıxaracaqlar.
Hörmətli Prezidentim, müsaidənizlə keçmişə bir ekskurs edirəm.
Ulu öndərin vaxtilə amansız mənəvi terrora məruz qalmasını biz unutmamışıq. “Lit. qazeta”nın səhifələrində daha o çirkab, iftira qalmadı ki, Heydər Əliyevin üzərinə atılmasın. Ən mənfur məqalələri yazan Arkadiy Vaksberq adlı bir haramzada idi. E. Axundova bu şərəfsiz qəzetdə işləməyindən indi fəxrlə danışır.
O ağır aylarda biz heç bir yerdə bu xanımın səsini eşitmədik.
“Azadlıq” radiostansiyasının ABŞ-ın Mərkəzi Kəşfiyyat idarəsinin eqidası altında fəaliyyət göstərməsini hamı bilir. ABŞ imperiyasının təxribat ruporuna dönmüş bu ermənipərəst radio gecə-gündüz türk-islam və pravoslav dünyasının tərəqqipərvər sağlam qüvvələrinə qarşı mübarizə aparıb, aparmaqda da davam edir.
Elmira Axundova bu radioda çalışmağından fəxrlə danışır. Bilməmişdik, heç demə iblis imperiyasının ən məkrli, ən mənfur radiosunda Elmira xanım millətimizin şərəfini qoruyub, odlu-alovlu çıxışlar edib. Buna hansı axmaq inanar?
Hörmətli Prezidentim, bir ayağı gorda, bir ayağı bu dünyada olan qocaman veteranın acizanə xahişini yerinə yetirin, qoy Sizin əməkdaşların biri Elmira xanımdan soruşsun: “Siz nə vaxt səmimi olmusunuz, Prezidentə bayağı mədhiyələr deyəndə, yoxsa Cəmil Həsənlinin qarşısında reveranslar edəndə? İzdihamlı yığıncaq və görüşlərdə Cəmil Həsənli ağına-bozuna baxmadan üyüdüb tökəndə, niyə sinənizi qabağa verib Prezidentin şərəfini qorumadınız?”
Bilirəm ki, cavab alınmayacaq. Belə mənəvi bir baqajla tez-tez telekanallara çıxıb nəsihətbazlıq edən, mənəvi dəyərlərdən, vətəndaşlıq borcundan danışan bu xanım məndən, ayda 160 manat təqaüd alan qocadan beş min manat cərimə tələb edir. Yəqin oğlunun maşın kolleksiyasına birini də əlavə etmək istəyir, amma pul çatmır.
İyirmi il ərzində üç-dörd bayrağa qulluq etmiş bu xanım barədə qəzet səhifələrinə çıxartdığım sözləri bir də təkrar edirəm, “onun hər bir çıxışı hamıda sarkastik gülüş doğurur!” Səbəbi hamıya bəllidir. Bu ittihamını məhkəmədə də sübut etmişəm...
Hörmətli Prezident, Sizdən təvəqqe edirəm deputat balasının müflis edib küçələrə saldığı insanların dadına çatın! Göstərişinizlə geniş təhqiqat aparılsa çox əmmalar üzə çıxacaq və əminəm ki, Elmira Axundova min mükafat, titul sahibi də, olsa bir saat da Milli Məclisdə oturmayacaq.

Sədaqət və hörmət hissi ilə: Feyruz Haşımov