Tbilis Meriyası aksiya keçirməyə əvvəl şifahi olaraq "hə” desə də, təəssüf ki, tədbirdən bir gün öncə rəsmi olaraq icazə verilmədiyini bildirib. Bu isə soydaşlarımızın konstitusion hüquqlarının pozulması və demokratik imic qazanmış Gürcüstanda insan azadlıqlarının boğulmasıdır. Niyə gürcülər, ermənilər Gürcüstan vətəndaşı kimi istədikləri vaxt etiraz aksiyası keçirə bilər, azərbaycanlılar yox? Bu, azərbyacanlılara qarşı ayrıseçkilik deyil, bəs nədir? Yaxşı olar ki, Gürcüstan hökuməti hər bir vətəndaş kimi azərbaycanlıların da hüquqlarının tanınması yolunda doğru qərar qəbul etsin və soydaşlarımıza Dağlıq Qarabağ münaqişələrində iştirak etmiş qatil Mixeil Avakyanın abidəsinin ucaldılmasına etiraz olaraq aksiya keçirməsinə imkan versin. Bu, həm də Gürcüstanın demokratik adının isbatı olar.

"Bu, vətəndaşın öz soydaşına həmrəylik nümayiş etdirən bir aksiya idi”

Gürcüstanda soydaşlarımızın etiraz aksiyası keçirməsinə icazə verilməməsi ilə bağlı Borçalı əsilli yazar-ekspert Sərkərdə Sərxanoğlu "Hürriyyət”ə bildirdi ki, fevral ayının 5-də əli azərbaycanlıların qanına batmış Mixeil Avakyan adlı erməninin Axalkalakidə büstünün qoyulmasına etiraz olaraq, soydaşlarımız Tiflisdə parlament binasının önündə aksiya keçirməyi planlaşdırırdılar: "Bu, vətəndaşın öz soydaşına həmrəylik nümayiş etdirən bir aksiya idi. Təbii ki, bu aksiyada heç bir siyasi tələb yox idi, siyasi çalar da axtarmağa dəyməz. Soydaşlarımız yığışıb, Gürcüstan kimi demokratik bir ölkədə baş kəsən bir qatilə heykəl qoyulmasına etiraz etmək niyyətində və Azərbaycan dövləti ilə həmrəy olduqlarını hər zaman olduğu kimi bir daha nümayiş etdirmək istəyində idilər. Mən də bir yazar və hər zaman Borçalı məsələsinə həssas yanaşan bir insan kimi aksiyaya haqq qazandırdım. Hesab edirəm ki, insanlar nəinki azərbaycanlıları narahat edən, eyni zamanda gürcü cəmiyyətini və Gürcüstan dövlətini perspektiv baxımdan təhdid edən bu addıma qarşı mütləq etiraz aksiyası keçirməlidir. Bu baxımdan, mən də sosial şəbəklər üzərindən soydaşlarımızı bu aksiyaya dəstək verməyə dəvət etdim. Amma, bildiyimiz kimi, dövlət qurumları bu aksiyanın keçirilməsinə icazə verməyiblər. Buna görə, təşkilatçılar növbəti dəfə müraciət edərək, fevralın 8-də etiraz aksiyası keçirmək üçün icazə istəyiblər.

Təbii ki, Gürcüstan dövlətinin etiraz aksiyasına icazə verməməsi ilə bağlı bir çox fikirlər söyləmək olar. Maraqlı insanlar burada siyasi çalar da axtara bilər. Bəzi insanlar bunu ikili mövqe kimi də dəyərləndirə bilərlər və yaxud adi, normal bir hal kimi yanaşmaq da olar. Baxır, insanlar bu məsələyə hansı prizmadan nəzər salacaqlar”.

"Aksiyaya icazə verilməməsi bütün hallarda üzücüdür”

S.Sərxanoğlunun sözlərinə görə, Mixeil Avakyanın büstü qoyularkən gürcü hökuməti bunun ən azı nəticələrini təxmin etmişdi: "Yəni Azərbaycan cəmiyyəti, eyni zamanda Gürücüstanda yaşayan soydaşlarımız bu məsələyə səssiz qalmayacaqdılar. O zaman bu hadisəyə görə insanların dinc şəkildə etiraz etmək, heç bir siyasi motivi olmayan bir etiraz aksiyası keçirmək istəyinin qarşısının alınması suallar yaradır. Amma mən tələsməməyi məsləhət görürəm. Ayın 8-də planlaşdırılan ertiraz aksiyasına veriləcək cavabı aldıqdan sonra, birmənalı şəkildə orada nələrin baş verdiyi haqqında fikir mübadiləsi aparmaq olar. Amma aksiyaya icazə verilməməsi bütün hallarda üzücüdür”.

"Niyə erməniyə olar, mənə olmaz, biz bu ölkənin eyni hüquqlu vətəndaşları deyilikmi?”

S.Sərxanoğlu onu da xatırlatdı ki, bir neçə ay əvvəl Marneuli şəhərində Nəriman Nərimanovun büstünün götürülməsi ilə bağlı da çox ciddi etirazlar olmuşdu: "Büstün yerinə qaytarılması, mədəniyyət mərkəzinə təzədən Nəriman Nərimanovun adının verilməsi ilə bağlı imza toplama kampaniyası belə keçirildi və bu məsələyə gürcü hökuməti tərəfindən hər hansı reaksiya verilmədi. O zaman insanın içində bir sual yaranır ki, niyə erməniyə olar, mənə olmaz, biz bu ölkənin eyni hüquqlu vətəndaşları deyilikmi? Qeyd etdiyim kimi, səbrli olaq, tələsməyək.

Amma bir məsələni mütləq mənada diqqətdə saxlamalıyıq. Sadə insanların emosiyaları ilə oynamaq olmaz. Çünki bundan istifadə etmək istəyən qüvvələr hər zaman mövcuddur, hər zaman tətikdədirlər və bunun ən bariz nümunəsi bir neçə gün əvvəl Rusiyada yaşayan Söyün Sadıqov adlı bir şəxsin açıqlamasıdır, hansı ki, həmin şəxs kimlərisə təhdid dili ilə hədələyir, asır, kəsir, "muxtariyyət elan edəcəyik”, "müxtariyyətimizi tələb edəcəyik” kimi fikirləri dövriyyəyə buraxır. Bu gün Gürcüstandan aldığım informasiyalar onu göstərir ki, bu, heç də boşuna deyil və əsassız formada səsləndirilməyib. Çünki orada etiraz aksiyasının keçirilməsinə dövlət səviyyəsində icazə veriməməsinə baxmayaraq, bir qrup insanı icazəsiz aksiyalara çağırırlar. Bu da olduqca zərərli bir tendesiyadır və bunun nəticələri çox ağır ola bilər”.

"Azərbyacan dövləti soydaşlarımızın taleyinə biganə yanaşmamalıdır”

S.Sərxanoğlunun fikrincə, bütün bu proseslərdə Azərbyacan dövləti də səssiz, seyrçi qalmamalı, soydaşlarımızın taleyinə biganə yanaşmamalıdır: "Təbii ki, orada dövlətin içərisində hansı məmurun hansı düşüncədə olduğunu biz bilmirik. Sabah Azərbaycan dövləti ilə həmrəylik nümayiş etdirən hər hansı soydaşımız, tələbəmiz orada hər hansı təqiblə, təzyiqlə üzləşərsə, Azərbaycan dövləti birmənalı şəkildə həmin şəxsin yanında olacağını çəkinmədən bəyan etməlidir. Çünki orada soydaşlarımızı bütün parametrlər ilə dəstəkləmək Azərbaycan dövlətinin borcudur. Qeyd etdiyim kimi, soyadşlarımız sırf Azərbaycan xalqı ilə bir yerdə olduqlarını göstərmək, Azərbaycan dövlətinin adına bu aksiyanı təşkil etməyə çalışşırlar”.

"Dövlətimizin adını bəzi-bəzi xırda maraqları olan qruplarına alətinə çevirməyək”

"Mən buradan Azərbaycanı ittiham etməyə çalışan, bu olaylarda Azərbaycanın adını mənfi yöndə hallandırmaq istəyən bəzi insanlara və yaxud qruplara da səslənirəm. Emosiyalarımıza hakim olaq, tələsməyək, səbrlə, soyuqqanlı yanaşaq və dövlətimizin adını bəzi-bəzi xırda maraqları olan qruplarına alətinə çevirməyək. Bunların hansısa məqsədlər üçün istifadəsinə yol verməyək ki, Azərbaycanın adını hansısa xırda işlərdə hallandırsınlar”,-deyə yazar-ekspert vurğuladı.

"Gürcülər ermənilər tərəfindən ərazi iddialarının səsləndirilməsini unutmamalıdırlar”

S.Sərxanoğlu gürcü cəmiyyətinə də səsləndi: "Bizim soyadaşlarımzın aksiyası Gürcüstan dövlətinin suverenliynə və Gürcüstan xalqının təhlükəsizliyinə, eyni zamanda gürcü xalqı ilə bir yerdə olmağımıza hesablanmış bir aksiyadır. Çünki yaxın tarixdə ermənilərin Gürcüstana ərazi iddiaları heç kimin yaddından çıxmayıb. Müasir dövrümüzdə də Abxaziyada erməni batalyonunun gürcülərə tutduğu divan, eyni zamanda Cavaxetiyada və Axalkalakidə ermənilər tərəfindən mütəmadi olaraq separatçı şüarların, ərazi iddialarının səslədirilməsini gürcülər unutmamalıdırlar. Və bilməlidirlər ki, bu gün orada qoyulan büstün varlığından ilham alıb, sabah daha güclü, yüksək səslə separatçı səslərin çıxmasına, ərazi iddiaların səslənməsinə səbəb olacaq. Borçalıların etiraz aksiyası həm də o səsin boğulmasına, o səsin bir daha çıxmamasına hesablanmış aksiyadır. Ona görə də gürcü cəmiyyətinin aktivlərini də, gürcü ziyalılarını da bu aksiyada görmək istəyərdik. Hesab edirəm ki, onlar da azərbaycanlılarla çiyin-çiyinə meydana çıxmalı, "erməni avantüristlərinə, terrorçularına, qatillərinə bu torpaqda yer yoxdur” şüarı ilə öz səslərini ucaltmalıdırlar”.

Şamo EMİN, Hurriyyet.org