İki gün öncə Azərbaycan 27 sentyabr – Vətən müharibəsinin başladığı günün bir illiyini qeyd etdi. Bununla bağlı Bakıda möhtəşəm Anım günü yürüşü də keçirildi. Qarşıda isə bizi Zəfər gününün ildönümü gözləyir.
Artıq zəfər tariximiz orta məktəblərdə tədris olunmağa başlayacaq. Bu gündən etibarən bütün ümumi təhsil müəssisələrinin IX siniflərində “Zəfər tarixi” kursu keçiriləcək. “Zəfər tarixi” kursu tədris dilindən asılı olmayaraq, bütün siniflərdə dövlət dilində - Azərbaycan dilində 1 saat tədris olunacaq.
Bəs Azərbaycanın son 30 ildə yaşadığı tarix, 27 sentyabrdan başlayan 44 günlük Vətən müharibəsi, topaqlarımızın işğaldan azad edilməsi, Zəfər tariximizin təbliği, onun yeni gələn gənc nəslə aşılanması üçün daha nələr edilməlidir? Görülən işlər yetərlidirmi?
Mövzu ilə bağlı təhsil eksperti Kamran Əsədov Musavat.com-a danışıb:
“Öncə qeyd edim ki, Azərbaycanın 44 günlük Vətən müharibəsi tarixinin orta məktəblərin tədris proqramına daxil edilməsi olduqca mühümdür. Bildiyiniz kimi, hazırda 4435 orta ümumtəhsil məktəblərində 1,6 milyona yaxın şagird təhsil alır. Orta ümumtəhsil məktəblərinin də əsas funksiyası ondan ibarətdir ki, şəxsiyyət yetişdirsin. Birmənalı olaraq biz şagirdlərimizə məhz şəxsiyyət kimi formalaşmasında müsbət təsir göstərəcək biliklərlə yanaşı Zəfər tarixini də təbliğ etməliyik və bu çox vacibdir.
Məlum olduğu kimi, Təhsil Nazirliyinin müvafiq qərarı ilə artıq orta ümumtəhsil müəssisələrində ayrıca “Zəfər tarixi” dərsliyi yazılıb. Bu çox təqdiredici addımdır. Nəzərə alsaq ki, bu günə qədər dərsliklərə məğlub olmağımız, itirdiyimiz torpaqlar haqda məlumat verilirdi və nəticədə şagirdlərimiz müəyyən qədər bədbin ruhda böyüyürdü. Lakin bir il öncə Azərbaycan əsgəri Ali Baş Komandanın rəhbərliyi altında böyük tarixi uğura imza atdı, 30 il işğal atında qalan torpaqlarımız, eyni zamanda pozulmuş hüquqlarımız bərpa edildi. İndi məhz bunu şagirdlərə aşılamalıyıq”.
Kamran Əsədov ekspert kimi öz təkliflərini də bildirib:
“Təklif edirəm ki, ali təhsil müəssisələrinə qəbul imtahanlarında bütün fənlər üzrə 44 günlük Vətən müharibəsi ilə bağlı test tapşırıqları salınsın. Həmçinin 2-ci və 3-cü ixtisas qrupu üzrə ali məktəblərinə qəbul imtahanlarında istifadəyə verilsin. Bunun üçün ümumtəhsil müəssisələrində şagirdlər “Zəfər tarixi”ni daha dərindən öyrənməlidirlər.
Çox təəssüf ki, bir çox hallarda şagirdlərimiz ali müəssisələrinə qəbul imtahanlarında istifadə edilməyən dərslikləri o qədər də istifadə etmirlər. Bu məsələyə xüsusi diqqət etmək lazımdır.
Hesab edirəm ki, “Zəfər tarixi” rus bölməsində geniş təbliğ olunmalı və bu tədris Azərbaycan dilində keçirilməlidir. Hətta digər dillərdə tədris olunan məktəblərdə də Azərbaycan dilində tədris olunmalıdır.
Daha bir məsələ, “Zəfər tarixi”ni təkcə 9-cu siniflərdə deyil, bütün siniflərdə pillələrlə çatdırmaq lazımdır. Əlbəttə ki, bu dərslik ildən-ilə təkmilləşəcək. Məlum məsələdir ki, orta ümumtəhsil məktəblərinin dərslikləri vaxtaşırı dəyişir”.