“Mən bir neçə dəfə demişəm ki, biz Ermənistanla sülh müqaviləsini imzalamağa hazırıq. Yəni bu işlərin başlanmasına hazırıq. Ancaq Ermənistan tərəfindən buna reaksiya yoxdur, rəsmi reaksiya yoxdur. Qeyri-rəsmi kanallarla bizə çatan məlumat budur ki, Ermənistan buna hazır deyil. Hesab edirəm, bu çox böyük bir səhv olacaq. Necə ki, müharibə ərəfəsində və müharibə dövründə Ermənistan tərəfi böyük səhvlər buraxıb, hərbi cinayətlər törədib. Bu, növbəti böyük səhv ola bilər”. Bunu Prezident İlham Əliyev Xocasəndə şəhid və qazilərlə görüşdə deyib.
Ermənistanın sülhə hazır olmaması daha çox erməni cəmiyyəti ilə bağlıdır, yoxsa bunu xarici güclər istəmirlər? Aydındır ki, iki ölkə arasında sülh müqaviləsi imzalanarsa, bəzi güclər Ermənistan üzərində təsir rıçaqlarını iitirəcəklər. Amma “nə müharibə, nə sülh” vəziyyəti sonsuza qədər davam edə bilməz.
Politoloq Qabil Hüseynli “Yeni Müsavat”a bildirdi ki, Ermənistan dövlətinin sülh müqaviləsini imzalamağa hazır olmamasında həm erməni cəmiyyətinin bir hissəsinin mövqeyi, həm də Ermənistana havadarlıq edən bir neçə xarici ölkənin mövqeyi öz təsirini göstərir. Daha çox isə burada məhz xarici təsir öz rolunu oynayır: “Artıq get-gedə məlum olur ki, Ermənistana Azərbaycanla sülh müqaviləsi imzalamağa imkan verməyən, sülh müqaviləsinin bağlanmasında maraqlı olmayan ATƏT-in Minsk Qrupunun həmsədri olan ölkələrdir. Xüsusilə də həmsədrlərdən biri-Ermənistanı öz forpostu hesab edən ölkə Ermənistana və Azərbaycana təsir rıçağını itirəcəyini düşünür və buna görə də mümkün qədər çalışır ki, sülh müqaviləsi imzalanmasın, vəziyyət qeyri-müəyyən şəkildə davam etsin. Bir sözlə, sülh müqaviləsinin bağlanmasına mane olan əsas qüvvə Ermənistana qəyyumluq edən ölkədir. O ölkə həm Ermənistanı, həm də Azərbaycanı özündən asılı vəziyyətdə saxlamaq üçün sülh müqaviləsinin imzalanmasını istəmir. Əgər sülh müqaviləsinin imzalanmasını istəsə, Ermənistanı çox asanlıqla buna yönəldər və regionda sülh bərqərar olar. Ermənistan suverenliyinin bir hissəsini məhz bu ölkəyə güzəştə gedib və onun ”sülh müqaviləsini imzala" tələbini yerinə yetirməkdən imtina etməsi mümkün deyil. Bölgədə sülhün bərqərar olmasını istəməyən digər qüvvələr də var. Bunlardan biri Fransadır. Müəyyən qədər ABŞ-ı da bu sıraya aid etmək olar. Bu üç ölkənin səfirlərinin Şuşaya səfərə getməməsi çox şeyi deyir. Bu ölkələr mənasız Minsk Qrupunu diriltmək və bunun vasitəsilə “nə sülh, nə müharibə” vəziyyətini mümkün olduğu qədər uzatmaq istəyirlər. Azərbaycanın qazandığı qələbənin əhəmiyyətini aşağı endirməyə çalışan qüvvələr var. Bu qüvvələr beynəlxalq təşkilatların ikili, üçlü standartlarından, xristian təəssübkeşliyindən istifadə edərək Azərbaycana qarşı təzyiq göstərməyə çalışırlar". 
Q.Hüseynli qeyd etdi ki, Ermənistan cəmiyyətində də müharibə tərəfdarı olan Qarabağ klanı və onların təsir altında olan qruplar, partiyalar sülh müqaviləsinin əleyhinədirlər. Onlar hətta Nikol Paşinyanı vaxtaşırı hədələyirlər, sülh müqaviləsindən çəkinməyə çağırırlar: “Nikol Paşinyan isə sanki başını itirib, hökuməti qurmaqda belə çətinliklər yaşadığı göz önündədir. O, hökumətini qurub möhkəmlənməyincə qeyd etdiyim tələblər və çağırışlar qarşısında aciz durumda qalacaq.
Azərbaycan dövləti və cəmiyyəti Ermənistanla sülh müqaviləsinin, regionda sülhün, dinc qonşuluq münasibətlərinin qurulmasının tərəfdarıdır. Lakin cəmiyyətdə həm də belə bir mövqe var ki, sülh birtərəfli mümkün deyil, qarşı tərəf də sülhə razı olmalıdır. Əgər qarşı tərəf-Ermənistan sülh müqaviləsindən yayınırsa, sülhün əleyhinə olan pozuculuq hərəkətlərini davam etdirirsə, Azərbaycan ərazisində hələ də öz hərbi qüvvələrini saxlayırsa və həmin hərbi qüvvələr yenə də bizə atəş açırsa, buna Azərbaycanın sərt cavabı olmalıdır. Cəmiyyət həm də bu mövqedədir. Azərbaycan cəmiyyəti ilə dövlətin rəhbərliyinin bu məsələdə də mövqeyi eynidir. Azərbaycan Prezidenti İlham Əliyevin xəbərdarlığı da təsadüfi deyil və Ermənistan bundan nəticə çıxarmalıdır, bu xəbərdarlığın ciddiliyinin fərqində olmalıdır. Əks halda, Ermənistan üçün sonra gec olacaq. Ermənistan cəmiyyətinin müharibə tərəfdarı olmayan kəsimi bütün bunları və onları yeni fəlakətin gözlədiyini nəzərə almalı və öz hakimiyyətlərinə Azərbaycanla sülh müqaviləsi bağlamaq üçün təzyiq etməlidir".
Politoloq vurğuladı ki, “nə müharibə, nə sülh” vəziyyəti uzun müddət davam edə, Azərbaycan dövləti, xalqı buna uzun zaman dözə bilməz: “Mən bir daha deyirəm ki, Azərbaycan Prezidentinin xəbərdarlığı çox ciddidir. Vətən müharibəsindən öncə də Azərbaycan dövlətinin lideri Ermənistan hakimiyyətinə yönəlik xəbərdarlıqlar, çağırışlar edirdi. İrəvan səriştəsizlik göstərdi və bu xəbərdarlıqlara nəzərə almadı. İndi də Prezident İlham Əliyev yeni xəbərdarlığını edir ki, Ermənistan nə qədər gec deyil Azərbaycanla sülh müqaviləsi imzalasın. İmzalamasa ziyanını Ermənistan özü çəkəcək. Ermənistanın sülh müqaviləsini imzalamaması hər keçən gün yeni antiterror əməliyyatlarını yaxınlaşdırır”.