Gənc blogerin barəsində dünyanın ən nüfuzlu nəşri olan «Washington Post»un manşetində məqalə dərc edilməsi ilə dövlətimizin və ölkə Prezidentinin adının pislənməsi kim(lər)in «xidmətidir»?
...Ötən gün dünyanın ən nüfuzlu nəşri olan «Washington Post»un bir manşet yazısına rast gəldim. Gerçəkdən düşündürücü və sensasiyalı hadisə idi. Axı heç bir vaxt manşetində Azərbaycanın haqq işinə, Avropanın, elə ABŞ-ın özünün iqtisadi-siyasətinə həmahəng neft strategiyası yürüdən ölkəmizin barəsində, yaxud Azərbaycan Prezidentinin ABŞ-ın dövlət siyasətinə balanslı siyasəti ilə cavab verən tutarlı dəstəyinə dair yazı verməyən belə bir nüfuzlu qəzet, nədən birdən-birə manşetində «Mehman Hüseynov azad edilməlidir və bu parodiyaya son qoyulmalıdır» başlıqlı məqalə dərc edir?
Yaxud, sualı başqa cür də ünvanlamaq olar: kimlərin «xidmətidir» ki, bu dövlətin vəzifəsini tutur, statusundan gen-bol istifadə eədərək bircə dəfə də olsun Prezident İlham Əliyevin fəaliyyəti barədə «Washington Post»un manşetində bircə məqalə dərc etdirə bilmir, amma bircə yalnış hərəkəti və şəxsi intriqası ilə, Mehman Hüseynovun başına gətirilənlər bəhanə edilərək Azərbaycan dövlətinin imicinə ağır zərbə vuran yazı dərc edilir? Bunu necə başa düşək???
Beləliklə, qeyd edilən məqalədə bloger Mehman Hüseynovun azad edilməsinə çağırış edilməklə, Azərbaycanda dissidentlər və jurnalistlərə qarşı təqiblər, ölkədə 10 jurnalistin həbsdə saxlandığı və 150 siyasi məhbusun olduğu qeyd edilir. "Mehman Hüseynov Azərbaycan hakimiyyəti haqqında narahatlıq doğuran həqiqətlər, o cümlədən rəsmilər arasında korrupsiya və polis qəddarlığını üzə çıxarmış bloger, mətbuat azadlığı fəalı və jurnalistdir. O, iki ilə yaxındır saxta ittihamlarla həbs edilib. Onun həbs müddətinin bitməsi yaxınlaşdıqca Azərbaycanın polis dövləti onu beş ildən yeddi ilə qədər həbsdə saxlamaq üçün ona qarşı saxtalaşdırılmış yeni ittihamlar irəli sürüb. Cənab Hüseynov buna etiraz olaraq aclıq elan edib. O azad edilməlidir və parodiyaya son qoyulmalıdır». Və məqalədə M.Hüseynovun barəsində qaldırılmış sonuncu cinayət işinə toxunulur, «…Yeni təqibin arxasında Azərbaycanda despot İlham Əliyev tərəfindən dissidentlər və jurnalistlərə qarşı təqiblər kimi bir ağır reallıq dayanır. İnsan hüquqları qruplarına əsasən, cənab Əliyevin həbsxanalarında 10 jurnalist də daxil olmaqla, 150 siyasi məhbus saxlanır» və s. kimi sərt ifadələr işlədilir.
Təsəvvür edin, baş məqalədə «Cənab Əliyev yəqin fikirləşir ki, heç kəs zəhmət çəkib, onun qəddar rəftarını sorğulamayacaq», -hədənin ardınca ölkə prezidenti İlham Əliyev qəddar ölkə başçısı kimi təqdim olunur. 
Məqalənin sonunda isə qəzet yazır: «…Diplomatik xidmətdə karyeralı diplomat Earl Litzenberger bu günlərdə ABŞ-ın Azərbaycana səfiri kimi təsdiq edilib. O, təsdiqi ilə bağlı dinləmələrdə bildirib ki, "demokratiyalar yalnız müstəqil ədliyyə, qanunun aliliyinə hörmət, azad media, aktiv vətəndaş cəmiyyəti, plüralizm, demokratik seçki prosesinin və insan hüquqları və fundamental azadlıqlara hörmət edildiyi zaman çiçəklənir”. Səfir öz vəzifəsində ilk addım olaraq bunu cənab Əliyevə yüksəkdən oxumalı və cənab Hüseynovun azad edilməli olduğunda israr etməlidir."
Mənim üçün bir məsələ xüsusilə düşündürücüdür: «Cənab Əliyev yəqin fikirləşir ki, heç kəs zəhmət çəkib, onun qəddar rəftarını sorğulamayacaq», -deyən qəzetin redaksiya heyətində bu qənaət hardandır ki, İlham Əliyev qəddardır? Şəxsən mən belə düşünürəm ki, İlhamƏliyev heç vaxt Ermənistan kimi yaramaz bir qonşumuzun işğalçılıq və qəddarlıq əməllərinə qarşı müharibə elan etdiyi bir vaxtda Mehman Hüseynov kimi gənc blogeri özünə mübarizə hədəfi seçsin! Dünyanın bu qarışıq və mürəkkəb hadisələrlə dolu meydanında böyük, dövləti siyasətlə məşğul olan İlham Əliyevin nəyinə lazımdır öz sıravi, bloger vətəndaşı ilə mübarizə aparsın?! Mehman Hüseynov bəzi məmurların korrupsiya əməllərini çəkib saytında ictimailəşdirirdi, dolayısı ilə elə korrupsiyaya açıq müharibə elan etmiş Prezident İlham Əliyevə məlumat ötürücülüyündə lazımi xidmətini göstərirdi. Elə isə, Mehman Hüseynovun həbs edilib içəri salınması kimə lazım idi: Prezident İlham Əliyevə, yoxsa əməllərinin faş olunmasından qorxuya düşən məmurlara??? 
Kim nə deyir-desin, mümkün olan iş deyil, ağlabatan, heç bir məntiqə uyğun gələn məsələ deyil ki, Prezident Mehman Hüseynovun həbsində maraqlı olsun. Elə isə, Mehman Hüseynovla şəxsi münaqişəsini-intriqasını «Washington Post»un baş məqaləsi səviyyəsinə qaldırtdırıb Azərbaycanın, onun dövlət rəhbərinin imicini zərbə altına qoyan kimdir axı? Hamı bilir ki, Mehman Hüseynov Nəsimi rayon Polis idarəsinin rəisi Musa Musayevin şikayəti əsasında həbs edilib ki, bəs gənc bloger o boyda rəisə hansısa bir videoçarxında böhtan atıb. Ermənistan yüz illərdir Azərbaycana, deməli, hər birimizə böhtan atır, heç məhkəməyə vermirik, indi bir bloger nəsə deyib, dünyamı dağılıb, milyonlarınızmı ələ keçirilib, düşmüsünüz onun üstünə ki, ömrünün axırınadək həbsdə qalmalıdır. Niyə bu intriqabazlardan soruşulmur ki, cənablar, məqsədiniz nədir, Mehman Hüseynov sizin tayınızdır? Ölkə prezidentini dünyaya qəddar rəhbər kimi təqdim edən məqalənin baiskarı kimi məsuliyyətinizi dərk edirsinizmi??? Bilirsinizmi ki, belə əsassız hərəkətlərinizin ağrısını sonda Azərbaycan və onun rəhbəri çəkməli olur!
«Turan»ın direktoru Mehman Əliyevlə də oxşar addımlar atılmışdı 2017-ci ildə. Vergilər Nazirliyi M.Əliyevin dövlətimizin iqtisadi mənafelərinə 60 min manat ziyan vurmaqda şübhəli bilinərək həbs edilmişdi. Heç yüz milyon dollarları mənimsəyib ölkədən qaçanlarla bu cür rəftar edilmir. Dünyanı üstümüzə qaldırdılar, arada Prezident İlham Əliyev baş verənlərə məsuliyyətli olaraq hədəf seçildi. Az sonra Mehman Əliyev həbsdən azad olundu və «Bu bir anlaşılmazlıq», -deyə məsələ qapadıldı. Bəs dünyanın gözündə, ictimai rəydə itirdiklərimiz??? Cənablar, bunlar kimə və nəyə lazımdır? Ümumiyyətlə, bunlar sizə lazımdırmı?
Hələ eramızdan əvvəl 460-400-cü illərdə yaşayıb-yaratmış qədim Yunan tarixçisi, tarix elminin banisi, "Peloponn müharibəsi tarixi”nin müəllifi Fukidid deyib: «Yalnız özünə bərabər olandan qisas almaq alicənablıqdır».
Asif Mərzili